Matur | mbl | 6.7.2023 | 14:00 | Uppfært 14:25

Focaccia-brauðið fullkomið í lautarferðina

Ítalskt focaccia-brauð er dásamlega gott brauð með rósmaríni og ólífum sem bragð er að. Það þarf ekki einu sinni að vera smjör, svo ljúffengt er það eitt og sér. Unsplash/JSB

Góð veðurspá er fram undan næstu daga og þá er lag að skipuleggja lautarferð eða heimsókn í sveitina. Upplagt er að taka með kræsingar í körfu eða pikknikk-tösku og ekkert er betra en að taka með heimabakað brauð. Ítalskt focaccia-brauð er dásamlega gott brauð með rósmaríni og ólífum sem bragð er að. Focaccia-brauð er gott eitt og sér og í raun þarf ekkert álegg á það. Það er því hið fullkomna brauð í lautarferðina. Auðvitað er hægt að taka hráskinku, osta og fleiri ítalskar kræsingar með, en brauðið er það besta. Hér er á ferðinni góð uppskrift að focaccia-brauði sem við á matarvefnum mælum með.

Focaccia-brauð

9 dl hveiti
30 g ferskt ger
½ dl góð ólífuolía
3 ½ dl vatn
2 tsk. salt
1-2 rósmarínstilkar eða eftir smekk
20 steinlausar ólífur, blanda svörtum og grænum
1 – 2 tsk. gróft salt af betri gerðinni

Aðferð:

Byrjið á því að hita ofninn í 190°C.
Leysið gerið í vatninu og hafið vatnið ylvolgt.
Bætið ólífuolíunni út í vatnið með gerinu.
Setjið hveiti og salt í hrærivélarskál.
Bætið vökvanum út í.
Hrærið með hnoðaranum þar til deigið er laust frá skálinni.
Takið til ferkantað form.
Penslið formið með ólífuolíu eða smjöri.
Setjið deigið ofan í formið og penslið yfir með ólífuolíu.
Skerið ólífurnar í sneiðar eða báta og potið þeim ofan í deigið og látið sjást í þær.
Slítið rósmarínið af stönglunum og potið þeim líka ofan í deigið.
Stráið grófu salti yfir.
Látið deigið hefast í forminu í um það bil 30 mínútur.
Ýtið varlega með lófunum á deigið í forminu þannig að það falli aðeins niður, jafnt.
Setjið formið með deiginu í miðjan ofninn og bakið í um það bil 20 mínútur.
Njótið vel.