Margt var um manninn þegar sýning Guðrúnar Helgu Kristjánsdóttur, Í góðum selskap, var opnuð í Ásmundarsal 22. nóvember. Í sýningunni er kafað ofan í þúsund ára gamlar hefðir og lifnaðarhætti Grænlendinga og Íslendinga sem eiga það sameiginlegt að hafa háð lífsbaráttu sína á Norðurslóðum.

Verkin eru unnin úr íslensku lambaskinni og selskinni frá Grænlandi í samstarfi við handverksfólk í Qaqortoq. Við meðhöndlun og vinnslu efnisins leitast Guðrún Helga við að sameina fortíð og nútíð með því að endurvekja ævafornt handbragð og fullnýta auðlindir með nútíma hönnun, og skapa vandaðar flíkur sem eru í senn tímalausar og einstakar.

Guðrún nálgast hönnunina sem listaverk og með sýningunni dregur hún línu á milli sjálfbærni og hönnunar. Á sýningunni verða til sýnis átta jakkar og hver þeirra er einstakur. „Á Grænlandi er lífsgjöf að veiða sel. Selurinn er veiddur til matar og selskinnið er afgangsafurð. Virðing Grænlendinga fyrir selnum birtist með þeim hætti að allar afurðir selsins eru nýttar til þess að geta gefið fjölskyldunni gott líf. Lífsbarátta Grænlendinga er undraverð,“ segir Guðrún um sýninguna.